महामुंबई |प्रतिनिधी – रायगड जिल्ह्यातील धार्मिक व समुद्रकिनारी पर्यटन स्थळांचा कायापालट करण्याच्या दिशेने मोठा पाऊल टाकण्यात आले आहे. श्रीक्षेत्र हरिहरेश्वर, दिवेआगरमार्गे मारळ आणि श्रीवर्धन या ठिकाणांचा समावेश केंद्र शासनाच्या ‘प्रसाद’ (Pilgrimage Rejuvenation and Spiritual Augmentation Drive) योजनेत करण्यासाठी महाराष्ट्र सरकारने केंद्राशी पत्रव्यवहार सुरू केला आहे.
या अनुषंगाने मंत्रालयात आयोजित उच्चस्तरीय बैठकीत उपमुख्यमंत्री अजित पवार यांनी पर्यटनविकासासंदर्भातील प्रस्ताव तत्काळ केंद्राकडे पाठविण्याचे आदेश संबंधित अधिकाऱ्यांना दिले. बैठकीला पर्यटनमंत्री शंभूराज देसाई, महिला व बालविकास मंत्री आदिती तटकरे, पर्यटन राज्यमंत्री इंद्रनील नाईक, खासदार सुनील तटकरे, तसेच विविध विभागांचे वरिष्ठ अधिकारी उपस्थित होते.
हरिहरेश्वर मंदिर व प्रदक्षिणा मार्गाचा विकास
श्री हरिहरेश्वर हे कोकणातील एक पवित्र तीर्थक्षेत्र असून, येथे दरवर्षी हजारो भाविक भेट देतात. या मंदिराभोवती प्रदक्षिणा मार्ग विकसित करण्याचा प्रस्ताव असून, त्यासाठी सुमारे २२ कोटी रुपयांचा निधी अपेक्षित आहे.
मारळ येथे आधुनिक स्टार गेजिंग सुविधा
कोकणातील आकाश निरीक्षणाची नव्या युगातील संधी – अशी ओळख मिळण्याची शक्यता असलेल्या मारळ येथील स्टार गेजिंग प्रकल्पाचे वैशिष्ट्य म्हणजे रायगड जिल्ह्यातील पहिले प्रगत खगोल निरीक्षण केंद्र होणार आहे. या प्रकल्पात पर्यटकांसाठी पारदर्शक डोम्स, साहसी खेळ, कॅम्पिंग झोन, व्याख्यानमालिका केंद्र व वनसंपदेसह अनुभवात्मक पर्यटनाची व्यवस्था करण्यात येणार आहे. एकूण २५ कोटी रुपयांची गुंतवणूक अपेक्षित आहे.
केंद्राकडे पाठपुरावा आणि टप्प्याटप्प्याने कार्यवाही
प्रसाद योजनेसाठी पात्र ठरण्यासाठी आवश्यक कागदपत्रांची पूर्तता, आराखड्यांची सादरीकरणे आणि खर्चाच्या मंजुरीचे टप्पे लवकरात लवकर पूर्ण करून पुढील कार्यवाही वेगाने पार पाडण्याचे निर्देश उपमुख्यमंत्र्यांनी दिले आहेत.
कोकण पर्यटनाला नवी ओळख
या योजनेअंतर्गत पर्यटन विकास झाल्यास हरिहरेश्वरपासून श्रीवर्धनपर्यंतचा सागरी किनारा फक्त धार्मिक नव्हे, तर साहसी व खगोल पर्यटनाचाही समृद्ध केंद्र बनू शकतो. कोकणातील पर्यटन वाढीस हातभार लावणाऱ्या या योजनांमुळे स्थानिक रोजगारातही वाढ होण्याची शक्यता आहे.
————————————————————-
#रायगडपर्यटन #हरिहरेश्वर #मारळस्टारगेजिंग #प्रसादयोजना #अजितपवार #कोकणविकास #महाब्रेकिंगन्यूज #TourismDevelopment #Konkan #Raigad
