यंदा थेट तुमच्या गावातून पंढरपूर वारी! एसटीची खास सेवा सुरू

आषाढी एकादशीनिमित्त पंढरपूरवारीसाठी खास एसटी आणि रेल्वे सेवा; आता तुमच्या गावातून थेट पंढरपूरची सोय!

आषाढी एकादशी म्हणजे महाराष्ट्रातील लाखो विठ्ठल भक्तांसाठी अत्यंत श्रद्धेचा वारीचा सोहळा. यंदाही ही परंपरा जपण्यासाठी राज्य परिवहन महामंडळ (MSRTC) आणि मध्य रेल्वेने भाविकांच्या सोयीसाठी विशेष वाहतूक व्यवस्था आखली आहे.

5200 विशेष एसटी बसगाड्या भाविकांच्या सेवेत

एसटी महामंडळाने जाहीर केले आहे की, आषाढी एकादशीच्या पार्श्वभूमीवर राज्यभरातून एकूण 5200 विशेष एसटी गाड्या सोडण्यात येणार आहेत. या गाड्यांद्वारे 75 वर्षांवरील ज्येष्ठ नागरिकांसाठी ‘अमृत योजना’ अंतर्गत मोफत प्रवास, तसेच महिलांसाठी ‘महिला सन्मान योजना’ अंतर्गत ५०% सवलत लागू राहणार आहे.

गावातून थेट पंढरपूरची सेवा – तुमच्या सहभागावर अवलंबून

यंदा एसटी महामंडळाने एक अनोखी योजना लागू केली आहे. जर तुमच्या गावातून किमान ४० भाविक एकत्र आले, तर गावातून थेट पंढरपूरसाठी विशेष एसटी बस उपलब्ध करून दिली जाणार आहे. यासाठी संबंधित एसटी आगाराशी संपर्क साधावा लागेल.

मध्य रेल्वेकडून 80 विशेष गाड्या – 1 ते 10 जुलै दरम्यान सेवा

मध्य रेल्वेने 1 जुलै ते 10 जुलै या कालावधीत पंढरपूर व मिरजमार्गे एकूण 80 आषाढी विशेष ट्रेन चालवण्याची घोषणा केली आहे. यामध्ये नागपूर, अमरावती, खामगाव, भुसावळ, लातूर, कोल्हापूर, पुणे आदी ठिकाणांहून विशेष सेवा सुरू होणार आहेत.

पंढरपूरमध्ये चार तात्पुरती एसटी स्थानके

वारीकाळात गर्दी नियंत्रणासाठी चंद्रभागा, भीमा, पांडुरंग (ITI कॉलेज) आणि विठ्ठल कारखाना येथे तात्पुरत्या एसटी स्थानकांची उभारणी करण्यात येणार आहे.

आरक्षण प्रक्रिया 16 जूनपासून सुरू

रेल्वेच्या विशेष गाड्यांचे आरक्षण 16 जूनपासून IRCTC संकेतस्थळावर आणि सर्व संगणकीकृत केंद्रांवर सुरू होईल. विशेष शुल्कासह आरक्षणाची सोय असेल.

यंदाची आषाढी वारी अधिक सुकर आणि सोयीची ठरणार आहे. एसटी आणि रेल्वे दोघांनीही भाविकांसाठी विशेष गाड्या उपलब्ध करून देण्याची व्यवस्था केली आहे. आपल्या गावातून थेट पंढरपूरवारीची संधी मिळवण्यासाठी लगेचच तुमच्या स्थानिक एसटी आगाराशी संपर्क साधा.

#आषाढीवारी2025 #पंढरपूर #विठ्ठलभक्त #STspecial #IRCTCbooking #AshadhiEkadashi #आषाढीवारी2025 #पंढरपूरवारी #विठोबा #विठ्ठलभक्त #STspecial #रेल्वेगाड्या #वारी2025