नवी मुंबई (विशेष प्रतिनिधी):
कोल्हापूर येथील सिद्धगिरी मठाचे मठाधिपती प.पूज्य श्री अदृश्य काडसिद्धेश्वर स्वामीजी यांच्या महन्मंगल उपस्थितीत नवी मुंबईत उद्या (रविवार, दि. २२ नोव्हेंबर २०२६) भव्य ‘अध्यात्मिक सत्संग व ज्ञानबोधपर प्रवचन सोहळ्याचे’ आयोजन करण्यात आले आहे. ब्रह्मलीन स.स. काडसिद्धेश्वर स्वामी महाराज (कोल्हापूर) यांच्या प्रेरणेने होणाऱ्या या सोहळ्याला परिसरातील नागरिक व भाविकांनी मोठ्या संख्येने उपस्थित राहावे, असे आग्रहाचे आवाहन आयोजकांच्या वतीने करण्यात आले आहे.
सिवुड्स (पश्चिम) येथील सेक्टर-४६ ए मधील साईकृपा सोसायटी समोरील नवी मुंबई महापालिका क्रीडांगणावर (खेळाचे मैदान) हा अध्यात्मिक सोहळा रंगणार आहे. धकाधकीच्या जीवनशैलीत मानसिक शांती आणि अध्यात्मिक उन्नतीचा मार्ग दाखवणारी ही पर्वणी नवी मुंबईकरांसाठी उपलब्ध झाली आहे.
असा असेल उद्याचा कार्यक्रम:
सायंकाळी ५.०० ते ७.०० वा.: सांप्रदायिक भजन
सायंकाळी ७.०० ते ९.०० वा.: प.पू. श्री अदृश्य काडसिद्धेश्वर स्वामीजींचे ज्ञानबोधपर प्रवचन व महाआरती
श्री. स. स. काडसिद्धेश्वर गुरुभक्त मंडळ, नवी मुंबई यांच्या वतीने या सोहळ्याचे नेटके नियोजन करण्यात आले आहे. “नवी मुंबई व परिसरातील सर्व गुरुभक्त, परमार्थी सज्जनवृंद आणि भाविक जनतेने या आनंदोत्सवास सहकुटुंब उपस्थित राहून सद्गुरु माऊलींच्या परमानंद दर्शनाचा, अमृतमय प्रवचनाचा आणि संत सेवेचा लाभ घ्यावा,” असे आवाहन मुख्य संयोजक सत्यवान आंब्रे आणि गुरुभक्त मंडळाच्या पदाधिकाऱ्यांनी केले आहे.


