लगोरी स्पोर्ट्स फेडरेशन ऑफ इंडियाच्या वतीने महाराष्ट्राचे मुख्यमंत्री मा. श्री. देवेंद्र फडणवीस यांची सदिच्छा भेट घेण्यात आली. या भेटीदरम्यान भारताच्या समृद्ध क्रीडा परंपरेचा वारसा असलेल्या लगोरी या खेळाच्या राष्ट्रीय व आंतरराष्ट्रीय स्तरावरील विकासाबाबत सविस्तर चर्चा करण्यात आली.
यावेळी लगोरी स्पोर्ट्स फेडरेशन ऑफ इंडियाचे महासचिव श्री. तुषार जाधव, फेडरेशनचे सदस्य डॉ. हेमंत पयेर तसेच तांत्रिक समितीचे चेअरमन श्री. राजेंद्र पाटील उपस्थित होते.
शिष्टमंडळाने मुख्यमंत्री महोदयांसमोर लगोरी या भारतीय पारंपरिक खेळाचा देश-विदेशात प्रसार करण्यासाठी राबविण्यात येत असलेल्या विविध उपक्रमांची माहिती सादर केली. तसेच आगामी नॅशनल गेम्स, स्कूल गेम्स फेडरेशन ऑफ इंडिया (SGFI) आणि असोसिएशन ऑफ इंडियन युनिव्हर्सिटीज (AIU) यांच्या क्रीडा स्पर्धांमध्ये लगोरी खेळाचा समावेश व्हावा, यासाठी आवश्यक सहकार्य करण्याची विनंती करण्यात आली.
यावर सकारात्मक प्रतिसाद देत मुख्यमंत्री मा. श्री. देवेंद्र फडणवीस यांनी लगोरी या भारतीय पारंपरिक खेळाच्या संवर्धन व प्रसारासाठी तसेच विविध राष्ट्रीय क्रीडा स्पर्धांमध्ये त्याच्या समावेशासाठी आवश्यक ते सहकार्य करण्याचे आश्वासन दिले.
भेटीच्या शेवटी लगोरी स्पोर्ट्स फेडरेशन ऑफ इंडियाच्या वतीने मुख्यमंत्री महोदयांचा सन्मानचिन्ह प्रदान करून गौरव करण्यात आला. तसेच लगोरी खेळाचे प्रतीक असलेला लगोरी सेट त्यांना भेट देण्यात आला.
ही भेट लगोरी खेळाच्या सर्वांगीण विकासासाठी आणि राष्ट्रीय स्तरावर अधिक व्यापक ओळख निर्माण करण्याच्या दृष्टीने महत्त्वपूर्ण ठरली.
