पुरस्कारामुळे रायगड जिल्ह्यामध्ये चैतन्याचे वातावरण
म्हसळा : प्रसाद पारावे
कला आणि सामाजिक क्षेत्रात अलौकिक कार्य करणाऱ्या आणि आपल्या प्रेमळ व मृदू, शांत स्वभावाचे बहुआयामी व्यक्तिमत्व संत निरंकारी मंडळाचे सेवादल रायगड क्षेत्राचे क्षेत्रीय संचालक प्रवीण पाटील यांना लोक हिंद सेवाभावी संस्थेने राज्यस्तरीय पुरस्काराने गौरविले आहे. त्यांना प्राप्त झालेल्या पुरस्कारामुळे रायगड क्षेत्रातील सेवादलांमध्ये चैतन्याचे वातावरण निर्माण झाले आहे.
सदर पुरस्कार वितरण सोहळा नुकताच रविवारी पार पडला. लोकप्रिय लोक हिंद न्यूज चॅनल व साप्ताहिक शिवमार्ग च्या विद्यमाने राज्यस्तरीय लोक हिंद गौरव पुरस्कार ज्ञानराज सभागृह पाचपाखाडी, ठाणे येथे पुरस्कार प्राप्त प्रवीण पाटील आणि त्यांच्या परिवाराने मान्यवरांच्या हस्ते स्वीकारला. शासकीय सेवेत कार्यरत असताना देखील आपल्या अंगी असलेल्या उपजत कलागुणांनी तसेच सद्गुरु माता सुदीक्षा जी महाराज यांच्या दिव्य कृपाशीर्वादाने संत निरंकारी मंडळ (रजि.) दिल्ली, केंद्रीय सेवादल यांच्या तसेच झोन खरसई 40-अ झोनल इंचार्ज प्रकाश म्हात्रे यांच्या समवेत रायगड जिल्ह्यातील सेवादलांचे रायगड क्षेत्रीय संचालक म्हणून गेली तीन दशके यशस्वीपणे सेवा सांभाळत आहेत.
या सेवेमध्ये प्रेम, नम्रता, सहनशीलता, विशालता, मानवी दैवी गुणांनीयुक्त असे शांत, मृदू, प्रेमळ स्वभावाने आणि शिस्त यामुळे प्रेम जिव्हाळ्याचे, आपुलकीचे, गुरुबंधूत्वाचे, सलोख्याचे, मित्रत्वाचे तसेच मानवतेचे नाते जोपासले आहे. क्षेत्रातील सर्व स्वयंसेवकांचे आदर्श, प्रेरणादायी व्यक्तिमत्व म्हणून त्यांच्याकडे आज पाहिले जाते. त्यांच्याकडे रायगड क्षेत्रासह महाराष्ट्रातील तसेच केंद्रीय स्तरावरील दिल्ली, हरियाणा राज्यातील समालखा येथील अंतरराष्ट्रीय स्तरावरील निरंकारी संत समागममध्ये सेवेची मोठी जबाबदारी दिली जाते आणि त्यांनी सद्गुरू कृपेने या सेवेमध्ये यशस्वी योगदान दिले आहे.
रायगड जिल्ह्यामध्ये कोरोना कालावधीत तसेच महाड येथील महापूर, रेल्वे अपघात, महाड येथील सावित्री पूल दुर्घटना, महाड येथील इमारत दुर्घटना अशा अपत्कालीन प्रसंगी तात्काळ रायगड जिल्ह्यासह मुंबईतील शेकडो खाकी वर्दीतील सेवादल स्वयंसेवकांना योग्य नियोजनाने नगरपालिका, पोलीस अधिकारी यांच्या मार्गदर्शनाखाली मदतीचा हात पुढे करून मानव सेवेसाठी मोठे योगदान दिले आहे. या मानवतेच्या कार्यामुळे मा.जिल्हाधिकारी, राज्य मंत्री महोदय, मा.जिल्हा पोलीस अधीक्षक यांच्या हस्ते संत निरंकारी मंडळाला विशेष गौरविण्यात आले आहे.
प्रविण पाटील यांना प्राप्त झालेल्या राज्यस्तरीय लोक हिंद गौरव पुरस्कारामुळे त्यांच्यावर संपूर्ण रायगड जिल्ह्यासह महाराष्ट्रातून अभिनंदनाचा वर्षाव होत आहे. त्यांच्या पुढील वाटचालीसाठी देखील मान्यवरांकडून शुभेच्छा दिल्या जात आहेत.
