रायगड : नगरपालिका निवडणुकीत घराणेशाहीचा प्रभाव वाढता? लेकी–सुनांचा बोलबाला चर्चेत
प्रतिनिधी – रायगड
रायगड जिल्ह्यातील नगरपालिका निवडणुकीचा राजकीय तापमान सातत्याने वाढत असताना, एक विषय जोरदार चर्चेत आहे—घराणेशाही. स्थानिक स्वराज्य संस्थांमधील नेतृत्व महिलांकडे देण्याचा ट्रेंड वाढतोय, मात्र त्यातही पुढाऱ्यांच्या घरातील लेकी–सुना पुढे येण्याचे प्रमाण विशेष लक्ष वेधून घेत आहे.
राज्यातील इतर भागांप्रमाणेच रायगडमध्येही “राजकारणात संधी मिळाली तर आपल्या कुटुंबातील व्यक्तीलाच मंचावर आणणे” ही परंपरा वर्षानुवर्षे टिकून आहे. ग्रामपंचायत, पंचायत समिती, जिल्हा परिषद, महापालिका किंवा विधानसभा–संसद, कुठेही पुढारी आपल्या घरातील सदस्यांना उमेदवारी देण्याचे प्रमाण लक्षणीय आहे.
रायगड निवडणूक : चार लेकी–सुना थेट नगराध्यक्षपदासाठी रिंगणात
या निवडणुकीत रायगडमधील चार राजकीय घराण्यांतील तरुणी—दोन लेकी आणि दोन सुना—थेट नगराध्यक्षपदासाठी उमेदवारी घेत आहेत. त्यामुळे संपूर्ण जिल्ह्याचे लक्ष या चार नवीन चेहऱ्यांकडे केंद्रीत झाले आहे.
अलिबाग – माजी नगराध्यक्ष प्रशांत नाईक यांच्या कन्या अक्षया नाईक (शेकाप)
मुरुड – माजी नगराध्यक्ष मंगेश दांडेकर यांच्या कन्या आराधना नाईक (राष्ट्रवादी काँग्रेस)
पेण – भाजप आमदार रवींद्र पाटील यांच्या सुनबाई प्रीतम पाटील (सलग दोनदा नगराध्यक्षा राहिलेल्या)
कर्जत – माजी आमदार सुरेश लाड यांच्या सुनबाई डॉ. स्वाती लाड (भाजप)
यापैकी अक्षया नाईक अवघ्या २२ वर्षांच्या असून त्या निवडून आल्यास रायगडमधील सर्वात तरुण नगराध्यक्षा ठरतील.
अनुभवी विरुद्ध नवख्या – संघर्ष चुरशीचा
प्रीतम पाटील या याआधी दोन कार्यकाळ नगराध्यक्षा राहिल्याने त्यांना अनुभवाचा मोठा फायदा आहे. मात्र उर्वरित तिन्ही उमेदवार राजकारणात थेट प्रथमच मैदानात उतरल्या आहेत. घरातील राजकीय वातारणामुळे त्यांची जाण वाढली असली तरी प्रत्यक्ष निवडणूक ही त्यांच्यासाठी पहिली मोठी परीक्षा आहे.
घराणेशाहीवर प्रश्न, पण महिला नेतृत्वाचा वाढता प्रभावही स्पष्ट
राजकारणात घराणेशाही हा नवा विषय नाही. मात्र, त्याचवेळी महिला नेतृत्वाला प्रोत्साहन मिळत असल्याचेही समर्थक सांगतात. अनेक महिलांनी आपल्या कर्तृत्वावर देखील प्रभावी कामगिरी केली आहे. पण महिला आरक्षणाच्या जागा आल्या की “घरातील महिलांना उभं करण्याचा” राजकीय पॅटर्न आजही बदललेला नाही, हे सत्य आहे.
स्थानीक मतदारांची उत्सुकता शिगेला
चारही उमेदवारांनी आपल्या शहरांमध्ये दमदार प्रचार सुरू केला आहे. वारसा, अनुभव, तरुण नेतृत्व, आणि महिला प्रतिनिधित्व—या सर्व मुद्द्यांमुळे ही निवडणूक अधिकच रोचक बनली आहे.
आता मतदार कोणावर विश्वास ठेवतात?
घराण्याचा वारसा पुढे नेणारे चेहरे जिंकतात की अनुभवी विरुद्ध नवख्या या लढतीत नवे समीकरण तयार होते?
याकडे संपूर्ण रायगडचे लक्ष लागले आहे.
